ابو ذيات من قلب المذار في ميسان
---------------------------------
يظالم لا تهيج الروح = خلها
عساها تموت بعد فراك = خلها
لزم ايدي الطبيب وصحت= خلها
المرض بالكلب جا شلك بديه
***
حبيبي لا تظن الدهر ** سرنا
هجرنا ديارنا و للغربة ** سرنا
و حكك ما ظهر للناس ** سرنا
لكن دمع العيون العم عليه
***
ايتهجه حروف علم ** و قره بيه
ونكرني و ما رضى بوصلي** و قربي
ادور يا ذنب عندي ** و اقر بيه
لكيت الطيب اكبر ذنب بيه
****
و حك الترك بين الناس ** ثقلين
و عيوني من السهر بجفاك ** ثقلن
احبك من صدك يفلان ** ثق لان
احس انك شراكه وياي بيه
***
عذاب الشوك شبك ** ساعديني
ساعة انخي الائمة و** ساعة ديني
على نص النوايب ** ساعديني
كلف ضيم العشك كله عليه
****
بغرامك لا صرت حايل ** و جاني
وسيفك بالغدر طرني** وجاني
صرت انت عليّ حاكم ** و جاني
اظلمتني وشمتت شماتي بيه
***
كلبي اشما يمر عالدار** يسلام
و من سهام العشك ما يوم ** يسلم
صدك عيب و حرام العشك ** يسلام
اذن مامش بعد طيبه وحميه
**
الدهر ما يوم حن كلبه ** و لانه
تفاركنه و الف واشي ** ولانه
لا انت عرفت الحب** و لا انه
ظلمنه الشوك و العشرة سويه
***
يواشي الكلب من الولف** لاذك
اكله الدرب هذا يكلي ** لا ذاك
تحاسبني يولفي بذنب ** لا ذاك
الاصابع ولك مو كلهن سويه
***
حكمني العشك بالحسرة ** و عافاك
و حكه الكلب لو ملّك ** و عافاك
دريت الحسن غر كلبك ** و عافاك
لجن طول العمر تندم عليه
***
يطارش هاك مكتوبي *** و سر بيه
حنين الكلب بسطوره *** و سر بيه
اخبره شوكت نتلاكه ***و اسر بيه
و على كل بيت اطشن واهليه
****
الجنت الهم بيوم الضيج ** وناس
صفوا بين اليسد الاذن** و الناسِ
زرعت الوفى لكل الناس ** و الناس
زرعتلي المصايب و الاذيه
***
كلبي انت ملكته *** و انت حر بيه
عليل و طبه عندك *** و انت احر بيه
كاس السم اشربه *** و انتحر بيه
و لا غيرك يمس جفوف ايديه
****
اني مهدم لجن وصلك ** بناني
ندم عالراح عضيته ** بناني
يشوفوني قوي و صاحي ** بناني
وانه بداخلي علة خفيه
***
روة الزيتون من دمعي*** و لا راك
لغيرك ما نحل جسمي *** و لا رك
اخاف تطول غيبتنه *** و لا راك
كبل وصلك تبادرني المنيه
****
اقدم الروح لحبابي *** و اسلم
و اصافح راحتي بجفهم *** و اسلم
يا رب العرش صلي *** و سلم
على المصطفى و اله بكل مسيه
****
تصد و تروح يبن ادم *** شمالك
عجب تصفّك يمينك وي *** شمالك
جنوبك هذا دوره وي *** شمالك
ابد ما تلكه مثل الطيب بيه
****
اكضي الليل كله قه** وي نوح
و اسمعك كلبي دوم يون** وينوح
نخيت الهادي سيد الخلق** وي نوح
يعابي كل خوي يخون خويه
***
يباري المرض هد حيلي*** و هدني
و لا يوم ابتعد عني *** و هدني
ارشدني لرحمتك يا رب *** و هدني
طريح فراش و العلة خفيه
*****
احس روحي تردلي *** و انت يمي
سفينة انه و سافر*** و انت يمي
حبيبة انت و عزيزة *** و انت يمي
تشب النار لوضعتي من اديه
*****************************
[center]